Frelsið er ekki bara fyrir hina fjáðu

Mikilvægt er að tryggja jafnvægi og verjast ásókn gróðaaflanna sem hugsa ekki lengra en fram að næsta tíkalli. Þetta kom fram í ræðu Ögmundar Jónassonar, formanns Bandalags starfsmanna ríkis og bæjar, á fyrsta maí hátíðarhöldunum á Akureyri í dag. Hann segir hlutverk verkalýðssamtaka sjaldan meira en nú.

Í ræðu sinni beindi Ögmundur orðum sínum til auðmanna og sagði að frelsið væri ekki bara fyrir hina fjáða. Gagnrýndi hann þá auðmenn sem í krafti auðs hafa tekið sér völd og beitt í eigin þágu fyrir að slíta í sundur friðinn í samfélaginu. Hann sagði þá óupplýsta þar sem þeir haldi að frelsið sé aðeins réttur þeirra til að ráða.

Ögmundur talaði ennfremur um breytt hlutverk verkalýðsamtakanna sem hann sagði sjaldan hafa verið mikilvægara en í dag. Tryggja þurfi jafnvægi í þjóðfélaginu, verjast ásókn gróðaaflanna og safna fyrir mögru árin. Lagði hann áherslu á að tryggja þurfi stöðugleika í samfélaginu og draga úr skuldasöfnun heimilanna. Sagði hann hagvöxt sem byggir á lánum og eyðslu vera falskur hagvöxtur og að hann gæti hrunið fyrr en varir. Búa þurfi til öryggi en ekki óðaverðbólgu og vaxtaokur.

Þá sagði Ögmundur það vera forgangsmál komandi ára að útrýma fátækt, tryggja jöfnuð og stöðugleika og standa vörð um velferðarþjónustuna. Ísland þurfi að laga sig að breyttum og opnari vinnumarkaði og breyttum viðhorfum til ummönnunarstarfa. Sagði hann nauðsynlegt að bregðast yrði við manneklu í heilbrigðiskerfinu en einnig í iðngreinum.

Ögmundur sagði ennfremur að Íslendingar þurfi að sýna erlendu aðkomufólki umburðarlyndi. Forðast þurfi all sem kljúfi þjóðfélagið og ekki skuli úthrópa þá sem vilji ræða þessi mál og ætla þeim illar hvatir.