Voru eldsupptökin ekki í Fröken Reykjavík?

Myndir sem birtar hafa verið á netinu gefa til kynna að eldurinn í húsasamstæðunni á horni Austurstrætis og Lækjargötu hafi hugsanlega ekki átt upptök sín í söluturninum Fröken Reykjavík eins og gefið hefur verið til kynna í fréttum. Myndirnar, sem voru teknar nokkrum mínútum fyrir klukkan tvö, eða rétt um það leyti sem tilkynnt var um eldinn, sýna að klukkan sex mínútur fyrir tvö eru menn komnir upp á þak veitingahússins Pravda. Þeir virðast vera að huga að eldinum.

Fyrstu vísbendingar um upptök eldsins bentu til að hann hefði verið í loftljósi í Fröken Reykjavík. Tæknideild lögreglunnar rannsakaði brunastaðinn í gær og hefur verið að fara yfir gögn málsins í dag. Rannsókn stendur yfir og er íkveikja nú ekki útilokuð frekar en aðrar orsakir.