Leitin að næstu sjónvarpsstjörnu

Það hlaut að koma að því. Strákarnir eru snúnir aftur ... fyndnari og frískari en nokkru sinni fyrr. Og markmið þeirra er aðeins eitt: Að leita að næstu sjónvarpsstjörnur Íslands... sjálfum arftökum sínum.

Leitin að Strákunum er alíslenskur og ofurraunverulegur skemmtiþáttur sem verður á dagskrá á föstudagskvöldum í vor og sumar á Stöð 2. Þar verða Strákarnir í essinu sínu, sýna allar sínar bestu hliðar og sanna þar með í eitt skipti fyrir öll að þeir eru bestu, fyndnustu og frábærustu sjónvarpsmenn í öllum heiminum og þótt víðar væri leitað.

Eins og nafnið gefur til kynna gengur Leitin að Strákunum út á að finna sjónvarpsstjörnur framtíðarinnar ... mögulega arftaka Strákanna. Og það verða hinir einu sönnu Strákar sem koma til með að stjórna leitinni og velja þá efnilegustu úr stórum hópi umsækjenda.

Í fyrsti þættinum, sem er á dagskrá í kvöld á Stöð 2, verður sýnt frá áheyrnarprufunum skrautlegu, sem fóru fram á Akureyri og í Reykjavík í mars. Þar fengu menn og konur 3 mínútur til að sannfæra Strákana um að þau ættu erindi í þáttinn og úr þessum hópi völdu Strákarnir þau 10 sem stóðu uppúr.

Hin 10 útvöldu taka svo þátt í sjálfri keppninni sem hefst formlega frá og með öðrum þættin og gengur þannig fyrir sig að Strákarnir leggja fyrir þau hinar ótrúlegustu þrautir og áskoranir, sem allir ættu að þekkja úr gömlu góðu Stráka- og 70 mínútna þáttunum.

Strákarnir þurfa síðan að dæma um það hverjir standa sig best og hverjir falla úr keppni. Keppendurnir týna tölunni einn af öðrum, einn í hverjum þætti, þar til þrír standa eftir sem sigurvegarar í Leitinni og fá að launum sinn eigin sjónvarpsþátt á Sirkus.

Alls verða þættirnir 9 talsins og á dagskrá á föstudögum klukkan 20.30.