Naomi þrífur klósett og skúrar gólf

Tískufyrirsætan Naomi Campbell mætti á háum hælum til vinnu í gær. Var þó ekki um hefðbundinn vinnudag að ræða hjá fyrirsætunni, heldur var hún að þrífa klósett og skúra gólf í sorpbirgðastöð í New York.

Naomi var dæmd til fimm daga samfélagsvinnu eftir að hafa kastað farsíma í aðstoðarkonu sína í janúar síðastliðnum. Voru þær að rífast um gallabuxur. Þegar fyrirsætan mætti til vinnu vakti athygli að hún kom í Christian Louboutin hælaskóm með rauðum sóla, sem þykir mjög móðins þessa dagana, en hafði meðferðis svört stígvél sem hún skellti sér í áður en vinnudagurinn hófst.

Mun Naomi vinna sjö tíma á dag með tveimur pásum inni á milli og felst starf hennar í margvíslegum hreingerningum á sorpbirgðastöðinni.