Sonur Angelinu grét við fyrstu kynni

Leikkonan Angelina Jolie hefur ættleitt lítinn dreng frá Víetnam. Fyrstu kynni leikkonunnar við nýjan son sinn gengu ekki áfallalaust fyrir sig en hún sótti hann á munaðarleysingahæli í borginni Ho Chi Minh í gær.

Drengurinn litli, sem er aðeins þriggja ára gamall, byrjaði að gráta hástöfum þegar Angelina beygði sig niður til að spjalla við hann. Segir forstöðumaður munaðarleysingahælisins frá þessu í viðtali við People. Angelina tók þessu þó vel og sagðist skilja það að drengurinn væri hræddur. Forstöðumaðurinn sagði hina nýbökuðu móðir síðan hafa farið afsíðis með drenginn til að jafna sig. Hann hefði síðan verið hress og kátur og byrjað að leika við bróður sinn Maddox.

Angelina kom ein að sækja drenginn sem hefur fengið nafnið Pax Thien. Hún ættleiddi hann sem einstætt foreldri þar sem víetnömsk ættleiðingarlög leyfa ekki ógiftum pörum að ættleiða, en samband Angelinu við leikarann Brad Pitt hefur ekki farið fram hjá neinum. Hún var þó ekki alveg ein í för þar sem Maddox var með henni.