Umboðsmaður Íslands

Sunnudagkvöldið n.k verður Einar Báðarson gestur í Sjálfstæðu fólki. Einar hefur upp á síðkastið einkum getið sér orð fyrir að hafa náð góðum árangri í að koma íslenskri tónlist á framfæri í Bretlandi, auk þess að vera fastagestur á heimilum landsmanna á hverju föstudagskvöldi, sem einn þriggja dómara í X-Factor.

Einar Bárðarson hefur komið víða við og afkastað ótrúlega miklu á stuttri ævi. Hann hefur samið mörg af vinsælustu dægurlögum síðustu ára, nægir þar að nefna "Farinn", og ekki má heldur gleyma Evróvisjónlaginu "Birtu" eða "Angel". Hann hefur verið einn stórtækasti tónleikahaldari landsins með fyrirtæki sitt Concert. Þá hefur Einar verið umboðsmaður nokkurra af vinsælustu dægurlagahljómsveitum og söngvara þjóðarinnar og fyrir vikið fékk var honum gefið viðurnefnið Umboðsmaður Íslands sem loðað hefur við hann síðan. Þá hefur Einar einnig sinnt umboðsmálum fyrir söngdívuna heimsfrægu Kiri Te Kanawa. Síðustu mánuði og ár hefur Einar helgað sig útgáfufyriræki sínu Believe og að koma umbjóðendum sínum Nylon-flokknum og Garðari Thór Cortes á framfæri á erlendum vettvangi, einkum í Bretlandi, þar sem Einar og fjölskylda hans eru nú búsett.

Jón Ársæll sótti á dögunum Einar og fjölskyldu heim til London og fékk að fylgjast með honum að störfum, enda er það ærið og yfirgripsmikið verk að koma íslenskum listamönnum á kortið í hinum harða heimi tónlistarinnar í Bretlandi.

Einnig kemur X-Factor töluvert við sögu í þættinum, en Einar er eins og alþjóð veit einn af dómurunum þremur sem ráða örlögum keppenda og bera einnig ábyrgð á því að koma sínu fólki alla leið í úrslit. Þegar hér er komið sögu í X-Factor eru leikar aldeilis farnir að æsast og í Sjálfstæðu fólki er skyggnst þar bakvið tjöldin með Einari og þreifað stuttlega á því hvernig stemmningin er og undirbúningnum háttað skömmu fyrir útsendingu.