Spaugstofumaður fann svarið í hóptrommuslætti

„Ég byrjaði að tromma á síðasta ári. Og fór að átta mig fjótlega á því að þetta var eitthvað miklu merkilegra en ég hafði haldið fram að því. Fór að rannsaka málið og komst að því að trommuleikur, og sérstaklega trommuleikur í hópi, er öflugt félagslegt fyrirbæri. Mannbætandi áhrif í alla staðai, félagslega, heilsufarslega og andlega. Heilrænt tromm,” segir Karl Ágúst Úlfsson Spaugstofumaður og ... trymbill.

Á laugardaginn ætlar Karl Ágúst að gangast fyrir miklum trommugerningi eða svonefndum trommuhring, í Kringlunni klukkan tvö. Er meiningin að gestum Kringlunnar gefist tækifæri á að setjast saman í hring og leiki saman allir sem einn á handtrommur. Og trommuslættinum mun Karl Ágúst stjórna. Hljóðfærin fær hann lánaðar hjá Hljóðfærahúsinu.

Trommarinn Karl Ágúst segist enda ekki eiga bumbur til að lána þeim mannfjölda sem að er stefnt. Einhvern veginn er það svo að menn tengja ekki Spaugstofumann Karl Ágúst trommuslætti. Ekkert sérstaklega. En hann hefur farið víða um veröld og kynnt sér fyrirbærið. Lært að stjórna trommuhringjum. Og ljóst má vera að honum er rammasta alvara með að halda bongum og kongum og hvað þetta heitir nú allt að fólki. Breiða út fagnaðarerindið.

„Í raun og veru. Ég er að temja mér að vera meira með hlutunum en á móti. Í staðinn fyrir að vera á móti firringu ætla ég að vera fylgjandi því að fólk tengist sjálfu sér. Finni lífsins takt, finni innri takt... í staðinn fyrir að tapa sér í þrasi og neikvæðni.”

En ertu ekki að velta þér upp úr þrasi og neikvæðni dagana langa í Spaugstofunni?

„Ég reyni reyndar að taka það jákvæðum tökum en sú hætta er fyrir hendi að maður sé eilíflega að hneykslast í staðinn fyrir að halla sér að því sem gengur í hina áttina.”

Og svarið fann Karl Ágúst í bumbuslætti. Hugmyndin er ættuð frá Afríku þar sem fólk kemur saman að degi loknum, kastar af sér amstri dagsins og spilar á trommur í hópi.

„Alveg rosalega áhrifaríkt og félagslega mikilvægt. Og má alls ekki misskiljast. Þetta er ekki endilega fyrir atvinnutrommara. Alls ekki. Þetta er fyrir alla. Enginn þarf að hafa snert á trommuskinni til að vera með. Hver gerir þetta á sinn hátt. Margir halda að þeir hafi ekki takt. En það er vitleysa. Við þurfum ekki annað en hafa hjartslátt til að hafa takt.”