Dauðhrædd við fangelsi

Gleðigjafinn Nicole Richie er skelfingu lostin við tilhugsunina um að lenda í fangelsi fyrir að hafa verið tekin ölvuð við akstur í desember síðastliðnum. Þetta hefur hún tjáð París Hilton, sem nú er aftur orðin besta vinkona hennar. Fangelsisótti Nicole er til kominn af því að þetta er ekki í fyrsta skipti sem hún er tekin fyrir ölvun við akstur.

Þær Nicole og París sáust nýlega borða saman á veitingastaðnum Mr. Chow, í Los Angeles. Þar sagði tárvot Nicole vinkonu sinni frá því hvað hún væri hrædd við að vera sett í fangelsi. París hughreysti hana eftir bestu getu og margsagði henni að þetta yrði allt í lagi.

Illgirni er aldrei langt undan þegar einhver er í vandræðum, og því hefur verið velt upp að Nicole hafi áhyggjur af því að hún sýnist of feit, í þverröndóttum fangabúningi. Stúlkan er ekkert nema skinn og bein, í dag, og hrein hörmung að horfa á hana.