Skilorðsbundinn dómur og sekt fyrir skattsvik

Karlmaður var í Héraðsdómi Reykjavíkur í dag dæmdur í átta mánaða skilorðsbundið fangelsi fyrir að skjóta undan virðisaukaskatti, greiða ekki opinber gjöld og fyrir bókhaldsbrot.

Var hann sakaður um að láta hjá líða að greiða hátt í sex milljónir króna í virðisaukaskatt af starfsemi sinni og sömuleiðis að greiða opinber gjöld sem hann hélt eftir að launum starfsmanna sinna, samtals um 4,5 milljónir króna. Þá var hann einnig ákærður fyrir að hafa látið undir höfuð leggjast að færa bókhald vegna starfsemi sinnar.

Maðurinn játaði brot sín skýlaust en í ljósi þess að um stórfelld brot var að ræða að mati dómsins þótt átta mánaða fangelsi, skilorðsbundið til þriggja ára hæfileg refsing. Honum ber einnig að greiða tæplega 21 milljón króna í sekt innan fjögurra vikna, ella sætir hann hálfs árs fangelsi.