Stórauka umferðarlöggæslu á næstu tveimur árum

Samgönguráðuneytið og Ríkislögreglustjóri undirrituðu í dag samstarfssamning um að stórauka umferðarlöggæslu á næstur tveimur árum. Verða 218 milljónir króna veittar til aukins eftirlits á tímabilinu.

Jafnframt var skrifað undir samstarfssamning milli Ríkislögreglustjóra, Umferðarstofu og Vegagerðarinnar um sjálfvirkt hraðaeftirlit á völdum stöðum á þjóðvegum landsins og er þar m.a. kveðið á um rekstur myndavéla og úrvinnslu gagna úr þeim. Vegagerðin annast kaup, uppsetningu og viðhald myndavélakerfisins eftir því sem fram kemur í tilkynningu.

Samningarnir eru gerðir á grundvelli umferðaröryggisáætlunar sem hefur það markmið að draga úr fjölda banaslysa og alvarlega slasaðra í umferðinni þannig að fjöldi slíkra tilfella á tímabilinu á hverja 100 þúsund íbúa verði ekki meiri hér á landi en hjá þeim þjóðum sem bestum árangri hafa náð í umferðaröryggismálum.

Fjármunirnir sem veittir eru samkvæmt samningnum fara meðal annars í kaup á hraðamyndavélum, öndunarsýnamælum, bifhjólum með ratsjárbúnaði með myndavélum ásamt ratsjártækjum með myndavélum í lögreglubíla sem notaðir verða við hraðaeftirlit. Þá fara tæpar 100 milljónir í sérstakt umferðareftirlit lögreglunnar á helstu þjóðvegum landsins.