Akureyri vill komast í hóp rólegra bæja

Akureyri stefnir að því að komast í hóp rólegra bæja um allan heim þar sem boðuð er andstaða við hraða. Það þýðir þó ekki að bærinn verði vinstri-grænn, segir bæjarstjóri.

Löngum hefur verið talað um Akureyri sem rólegan bæ. Gárungarnir gera nú grín að því að nú stefni í að Akureyri verði einskonar Latibær Íslands. Verið er að skoða hvort bærinn eigi að blanda sér í hóp rólegra bæjarfélaga víða í veröld, svokallaðra slow-city. Ef þetta skref verður stigið yrði Akureyri ekki kynnt hér innanlands sem mótvægi við höfuðborgarsvæðið heldur sem allt öðruvísi bær.

Borgarafundur fer fram í Ketilhúsinu í kvöld þar sem fram fer kynning á þessu, að Akureyri verði "Slow city" eða "Citta slow" upp á ítölsku, en hugmyndin er upprunnin á Ítalíu. Ef Akureyri verður Slow city er það talið geta aukið ferðamannastraum og yrði bærinn markaðssettur undir þeim hatti.

Ýmsir þættir þurfa að koma til að bær geti fallið í flokk rólegra bæja eða orðið slow city. Slíkir bæir eru andsvar við vélhyggju og hraða. Huga þarf að umgengni, umhverfi, umferð en hún er mun rólegri fyrir norðan en í Reykjavík eins og flestir þekkja, bæjarbrag, almenningssamgöngum, hreinleika en heilt yfir er byggt á lífsgæðaferðamennsku.