Vilja fá að skjóta refi í friðlandi á Hornströndum

Stjórn Skotveiðifélags Íslands vill að umhverfisráðherra beiti sér fyrir því að refaveiðar verði heimilaðar í friðlandinu á Hornströndum þar sem þeir telja að hann haldi niðri rjúpnastofninum á svæðinu.

Í bréfi til umhverfisráðherra segir stjórnin að félagsmenn og bændur hafi bent á að undanfarin tvö ár hafi óvenju mikið verið af ref á svæðinu og séu dæmi um að rjúpnaveiðimenn hafið skotið fleiri refi en rjúpur í haust. Athygli hafi vakið hversu lítið hafi verið af rjúpu á Vestfjörðum í haust og greinilegt sé að rjúpa hafi verið uppistaðan í fæðu refanna.

Ekki liggi fyrir nákvæmar rannsóknir hér á landi um að hve stór hluti rjúpan er af fæðu refsins en sænski vísindamaðurinn Tomas Willebrand hafi þó bent á að þegar rjúpnastofninn sé í lágmarki þá geti fælingarmáttur refsins truflað rjúpuna og valdið streitu í rjúpnastofninum, sem sé henni hættuleg.

Þá sýni rannsóknir í Bandaríkjunum og í Svíþjóð sýna að ef stofnar rándýra séu friðaðir í þjóðgörðum þá verði óeðlilegur vöxtur í þeim og dýrin fari að leita út fyrir þjóðgarðinn. Það sé undarlegt, segja skotveiðimenn, að annars vegar sé refurinn friðaður í friðlandinu á Hornströndum en sunnan við friðlandið sé greitt fé til að eyða honum.

Þá bendir stjórn Skotvís á að æðarrækt sé þýðingarmikil atvinnugrein á Vestfjörðum og refurinn hafi unnið gríðarlegt tjón á æðarvarpi á svæðinu.

Segja skotveiðimenn í bréfi sínu til umhverfisráðherra að af framangreindu megi sjá að full ástæða sé til að grenjavinnsla verði heimiluð nú þegar í vor.