HÍ og KHÍ sameinist á næsta ári

Þorgerður Katrín Gunnarsdóttir mælti fyrir frumvarpi um sameiningu Kennaraháskóla Íslands og Háskóla Íslands á Alþingi nú fyrir hádegi. Samkvæmt frumvarpinu er gert ráð fyrir að þeir sameinist undir nafni Háskóla Íslands og að sameiningin verði að veruleika 1. júlí á næsta ári. Nemendur sem eru í Kennaraháskólanum munu eiga rétt á að ljúka því námi sem þeir eru samkvæmt núgildandi námsskipulagi.

Meginmarkmiðið sameiningarinnar samkvæmt nefnd sem fór yfir kosti og galla hennar er að stuðla að eflingu háskólamenntunar á Íslandi, að tryggja fjölbreyttara og sveigjanlegra námsframboð í grunn- og framhaldsnámi kennara og að skapa aukin tækifæri fyrir nemendur í ólíkum deildum sameinaðs háskóla til að tengja nám sitt kennaranámi.

Gert er ráð fyrir að störf kennara og starfsmanna Kennaraháskólans flytjist yfir til hins sameinaða háskóla en embætti rektors Kennaraháskóla Íslands verður lagt niður.