Kópavogsbær gerir betri landakaup en Reykjavíkurborg

Bæjarstjórn Kópavogs hefur náð samkomulagi við eigendur Vatnsendalands um eignarnám á landi fyrir 2.500 íbúðir. Verðið sem bærinn greiðir er mun hagstæðara en það sem Reykjavíkurborg greiddi fyrir land í eigu Kjartans Gunnarssonar í Norðlingaholti seint á síðasta ári.

Viðræður milli eigenda Vatnsendalandsins og Kópavogsbæjar hafa staðið yfir í um eitt ár og náðist samkomulag í gær. Samkvæmt því fær Kópavogsbær landið á um þrjá og hálfan milljarð króna þegar allt er talið, en eigendur landsins fá að byggja fimm hundruð íbúðir á því, en bærinn sér um alla gatnagerð. Það þýðir að fermetrinn leggur sig á um fjórtán hundruð krónur en til samanburðar greiddi Reykjavíkurborg nýlega Kjartani Gunnarssyni á milli fimm til sex þúsund krónur fyrir fermetran í landi hans í Norðlingaholti. Gunnar Birgisson, bæjarstjóri í Kópavogi, segir að með þessu hafi Kópavogsbær tryggt sér byggingarland næstu 15 - 20 árin.

Gunnar Birgisson, bæjarstjóri í Kópavogi segir erfitt að gera sér grein fyrir heildaríbúafjölda í hinu nýja hverfi, enda eigi eftir að skipuleggja það. "En við reiknum m eð að á þessum 300 hekturum verði um 2.500 íbúðir."

Gunnar segist ekki vilja tjá sig um hvort Kópavogsbær sé þarna að fá betra verð en Reykjavíkurborg greiddi nýlega fyrir land Kjartans Gunnarssonar í Norðlingaholti. "En við erum ánægðir og þarna var farið bil beggja. Þarna fær bóndinn að byggja á sínu eigin landi og við fáuum einnig land fyrir okkur og íbúana, þannig að við erum sáttir," segir bæjarstjórinn í Kópavogi.