Kynnti heildstæða stefnu í málefnum innflytjenda

Ríkisstjórn Íslands hefur samþykkt stefnu um aðlögun innflytjenda að íslensku samfélagi sem innflytjendaráð hefur unnið á undanförnum misserum. Stefnan var kynnt á blaðamannafundi í félagsmálaráðuneytinu í dag.

Markmið stefnunnar er að tryggja sem best að allir íbúar landsins njóti jafnra tækifæra og verði virkir þátttakendur í samfélaginu og á sem flestum sviðum mannlífsins eins og segir í tilkynningu.

Þar er meðal annars lögð áhersla á að innflytjendur eigi kost á góðri íslenskukennslu og samfélagsfræðslu, að útlendingar á innlendum vinnumarkaði njóti sömu kjara og réttinda og aðrir, að innflytjendur hafi aðgang að fullnægjandi heilbrigðisþjónustu hér á landi og sömuleiðis félagsþjónustu. Þá er í stefnunni lögð áhersla á að standa dyggilega vörð um íslenska tungu.