Gripið hafi verið til fullnægjandi aðgera vegna máls barnaníðings

Dómsmálaráðuneytið telur að gripið hafi verið til fullnægjandi aðgerða vegna máls dæmds barnaníðings sem greint var frá í fréttaskýringarþætttinum Kompási á sunnudaginn var. Maðurinn reyndi að komast í samband við 13 ára stúlku í kynferðislegum tilgangi þegar hann dvaldi á áfangaheimilinu Vernd en stúlkan var tálbeita Kompáss.

Fram kemur í tilkynningu frá dómsmálaráðuneytinu að ráðuneytið hafi farið yfir málið með fangelsismálastjóra og lögreglustjóranum og að það sé mikils virði að mótaðar hafi verið reglur um miðlun upplýsinga til að halda aftur af síbrotamönnum.

Þá telur ráðuneytið að Vernd hafi brugðist rétt við með því að ákveða að endurskoða samning við Fangelsismálastofnun en hann miðar að því að auðvelda fanga aðlögun að samfélaginu eftir dvöl innan veggja fangelsis.

Dómsmálaráðuneytið vill auk þess auka samstarf Fangelsismálastofnunar og lögreglunnar á höfuðborgarsvæðinu við félagsþjónustur sveitarfélaga, barnaverndaryfirvöld og aðra lykilaðila til að beina síbrotamönnum af villu síns vegar og auka öryggi hins almenna borgara og ekki síst barna.