Þjónustusamningur Verndar endurskoðaður

Þjónustusamningur Verndar og Fangelsismálastofnunar verður endurskoðaður sérstaklega vegna barnaníðings, sem þar dvaldi og braut skilorð.

Frá athæfi mannsins var greint í fréttaskýringaþættinum Kompási á Stöð 2 og hefur maðurinn verið vistaður í fangelsi. Á stjórnarfundi Verndar í gærkvöldi var jafnframt ákveðið að að endurskoða allar reglur um inntöku og skilyrði manna til vistunar á áfangaheimili Verndar. Jafnframt að kanna úrræði til þess að girða fyrir að menn, sem eru að ljúka afplánun á áfangaheimilinu, gerist brotlegir við landslög, á meðan þeir dvelja þar.

Áfangaheimili er ekki fangelsi, en þar hafa margir fangar fengið að ljúka afplánun og er tilgangur Verndar með starfsseminni að þar fái fangar tækifæri til að aðlagast venjulegu lífi utan fangelsis, áður en afplánun lýkur. Fangahjálpin Vernd hefur starfað í 50 ár og hafa um 90 prósent vistmanna staðist öll skilyrði en þeir sem ekki hafa gert það hafa flestir brotið húsreglur.