Stjórn Verndar vonar að viðmót nágranna dofni ekki

Fangahjálpin Vernd vonar að vinsamlegt viðmót nágranna áfangaheimilisins dofni ekki þrátt fyrir þann skugga sem umræða síðustu daga hefur varpað á heimilið. Stjórn Fangahjálparinnar Verndar kom til fundar í kvöld til að ræða málefni áfangaheimilisins.

Í sjónvarpsþættinum Kompási sem sýndur var síðastliðinn sunnudag játaði Ágústs Magnússonar, dæmdur barnaníðingur, að hafa sett sig í samband við unga stúlku á meðan hann dvaldi á Vernd.

Í ályktun sem stjórnin sendi frá sér eftir fundinn segir hún mikilvægt að fara yfir alla þætti málsins til að átta sig á hvort eitthvað hafi farið úrskeiðis. Áfangaheimilið hafi notið góðs skilnings nágranna þess og vonar stjórnin að vinsamlegt viðmót nágranna dofni ekki. Bent er á að á undanförnum árum hafi um 90% vistmanna staðist öll þau skilyrði sem sett hafa verið fyrir búsetu á heimilinu. Þau 10% sem ekki hafa staðist þau hafa flest brotið húsreglur Verndar en ekki landslög. Allar reglur um inntöku og skilyrði til vistunar á Vernd verða endurskoðaðar ef ástæða þykir til.