Miðstöð munnlegrar sögu komið á fót

Miðstöð munnlegrar sögu verður opnuð við hátíðlega athöfn í Þjóðarbókhlöðunni á föstudaginn kemur. Eftir því sem fram kemur í tilkynningu mun miðstöðin beita sér fyrir söfnun, varðveislu, rannsóknum og miðlun á munnlegum heimildum, það er hinu talaða máli, sem snerta sögu lands og þjóðar.

Um leið verður tekin í notkun vefsíða Miðstöðvar munnlegrar sögu. Slóðin er www.munnlegsaga.is. Þar verður í framtíðinni hægt að nálgast skrár og jafnvel hluta af hljóðritasafni Miðstöðvarinnar. Að Miðstöð munnlegrar sögu standa, auk Landsbókasafnins, Sagnfræðistofnun Háskóla Íslands, Rannsóknarstofa í kvenna- og kynjafræðum við Háskólann og Kennaraháskóli Íslands.