Hrant Dink borinn til grafar í Istanbúl

Mikill viðbúnaður var í Istanbúl í dag þegar tugþúsundir manna söfnuðust saman á götum úti til að berja augum kistu blaðamannsins Hrants Dink sem borinn var til grafar í dag. Dink var skotinn til bana á föstudaginn.

Hann var umdeildur í heimalandi sínu og hafði verið dæmdur fyrir skrif sín um fjöldamorð Tyrkja á Armenum í fyrri heimsstyrjöldinnni en tyrknesk yfirvöld hafa hingað til ekki viljað viðurkenna að þar hafi verið framið þjóðarmorð. Við jarðarför Dinks í dag héldu syrgjendur á spjöldum sem á stóð „Við erum öll Armenar" og vildu með því styðja málstað Dinks.

Unglingur hefur verið handtekinn grunaður um morðið en myndir af honum sáust á öryggismyndavélum í nágrenni morðstaðarins. Auk unglingsins hafa sex aðrir verið handteknir grunaðir um aðild að morðinu.