Ljóðstafur Jóns úr Vör afhentur

Guðrún Hannesdóttir bar sigur úr bítum í hinni árlegu Ljóðasamkeppni Lista-, og tómstundaráðs Kópavogs 2007, Ljóðstafi Jóns úr Vör 2007, en úrslitin voru kunngjörð Salnum í Kópavogi í fyrradag. Þriggja manna dómnefnd keppninnar þótti ljóð Guðrúnar Offors bera af þeim rúmlega 350 ljóðum sem bárust inn í ár og fær hún að launum 500 þúsund króna peningaverðlaun og farandgrip til varðveislu: göngustaf úr safni Jóns úr Vör. Auk hennar fengu tveir aðrir höfundar viðurkenningu fyrir ljóð sín, þeir Eiríkur Örn Norðdal fyrir Parabólusetning og Hjörtur Marteinsson fyrir Gamalt sendibréf frá afa á deild fimm.