Innlent

Fleiri hafernir er nokkrum sinnum fyrr í talningu

Fleiri hafernir, tólf talsins, sáust en nokkru sinni áður í hinni árvissu vetrarfuglatalningu Náttúrufræðistofnunar sem fram fór í byrjun mánaðarins. Sáust þeir allt frá Meðallandi í austri, vestur og norður um til Vestfjarða.

Talið var á um 150 einstökum svæðum um land allt og hafa niðurstöður þegar borist frá 132 svæðum. Fram kemur á vef Náttúrufræðistofnunar að skráðir hafi verið 112 þúsund fuglar af 75 tegundum og bendir flest til þess að tegundirnar verði nokkru færri en undanfarin ár og munar þar mestu um þann fjölda flækingsfugla sem kemur fram hverju sinni. Æður er langalgengust fugla hér á landi sem sem fyrr en óvenju fáir snjótittlingar sáust eins og jafnan þegar snjór er lítill.



Þá sáust óvenjumargar súlur en þær koma yfirleitt að landinu síðla í janúar. Meðal sjaldgæfra fuglategunda má nefna hvítönd í Meðallandi og kúfönd á Sogi en sú síðarnefnda er sárasjaldgæfur flækingur frá Norður-Ameríku og er afar lík duggönd. Alls tóku um 130 manns þátt í talningunni og voru það allt sjálfboðaliðar eins og ávallt í sögu þessara talninga.

Enn fremur kemur fram á vef Náttúrufræðistofnunar að nokkuð af olíu hafi farið í sjóinn þegar Wilson Muuga strandaði við Hvalsnes skömmu fyrir jól en olían virtist hafa brotnað fljótt niður og menn urðu ekki varir við olíublauta fugla í kjölfarið. Aðeins einn olíublautur æðarfugl sást í Ósum við Hafnir en slíkir fuglar sjást yfirleitt í hverri talningu, án þess að stórslys hafi orðið.

Mest lesið


Fleiri fréttir

Sjá meira


×

Mest lesið