Undirbúningur að framboði Framtíðarlandsins komin lengra á veg en áður haldið

22. janúar 2007 19:00

Við gerð Kárahnjúkastíflu MYND/Gunnar V. Andrésson

Undirbúningur að framboði Framtíðarlandsins til Alþingis í vor er kominn lengra á veg en margir hafa haldið hingað til. Samkvæmt heimildum Fréttastofu Stöðvar 2, hefur verið leitað til fólks um mögulega þátttöku á væntanlegum lista Framtíðarlandsins.

Skoðanakönnun er einnig í gangi um hugsanalegt fylgi við Framtíðarlandið og þá hvaðan það fylgi kemur. Stjórnarmenn Framtíðarlandsins sem Fréttastofa Stöðvar 2 talaði við í dag, segja málið allt á afar viðkvæmu stigi enda þurfi að bera svo afdrífaríka ákvörðun sem framboð til alþingiskosninga undir félagafund. Líkleg dagsetning á félagafundinum er í kringum 13. febrúar. Framtíðarlandið er þverpólitískt með víðtækri þátttöku frumkvöðla, fræðimanna, viðskiptafólks, listamanna og einstaklinga af öllum sviðum atvinnulífsins, eins og segir á heimasíðu félagsins, og eru stofnfélagar á þriðja þúsund.

Að sögn eins af stjórnarmönnum Framtíðarlandsins er ekki víst hvort nafn Framtíðarlandsins yrði notað í framboði til Alþingiskosninga, en ef til þess kæmi væru mjög sterkir kandítar tilbúnir til að taka slaginn í vor. Viðkomandi vildi þó ekki nefna nöfn í því samhengi en nafnið sem heyrist oftast í þessari umræðu er nafn Ómars Ragnarssonar. Aðspurður í dag um þátttöku sína í framboði Framtíðarlandsins til þingkosninga, neitaði Ómar hvorki né játaði en sagðist hafa verið í óformlegum viðræðum við ýmis stjórnmálaöfl og stjórnmálamenn. Hann vilji þó bíða með endanlega ákvörðun sína framyfir Landsþing Frjálslynda flokksins sem haldið verður helgina 26-27 janúar. Ómar sagðist vilja skoða hvar hugsanlegt miðju-hægri framboð myndi taka fylgi, þá sé hægt að finna út af hvaða listum grænt framboð myndi taka af fylgi og hvaða þingmenn myndu detta út. Markmiðið í hans huga sé að fjölga grænum þingmönnum á Alþingi.

Mest lesið

Fleiri fréttir