Innlent

Hjálmar vill Suðurnesjakonu í þriðja sætið

Hjálmar Árnason, sem tapaði fyrir Guðna Ágústssyni í baráttu um fyrsta sæti Framsóknarflokksins í Suðurkjördæmi um helgina, og sagði sig í framhaldinu af listanum, vill að kona af Suðurnesjum skipi þriðja sæti listans í hans stað. Formaður flokksins hefur skilning á þessu sjónarmiði en segir það í verkahring flokksins í kjördæminu að raða fólki á listann.

Suðurnesjamaðurinn og þingflokksformaðurinn Hjálmar Árnason endaði í þriðja sæti í baráttu sinni gegn Guðna Ágústssyni Sunnlendingi og landbúnaðarráðherra um forystusæti flokksins í Suðurkjördæmi um helgina. Hjálmar tilkynnti þá þegar að hann ætlaði að hætta í stjórnmálum. Hjálmar bendir á að íbúar Suðurnesja séu 45 prósent íbúa kjördæmisins og vill að sá sem tekur þriðja sæti listans komi þaðan.

"Ég tel það vera mjög veikt að það skuli ekki vera Suðurnesjamaður í einu af tveimur til þremur efstu sætunum, líkt og er reyndar hjá öllum flokkum," segir Hjálmar.

Hjálmar segist ekki finna neina skýringu á slæmu gengi Suðurnesjamanna á framboðslistum flokkanna, aðra en þá að Suðurnesjamenn séu góðir sjómenn en kunni ekki að reka fé af fjalli. Það vekur reyndar athygli að hinn 15. desember skoruðu 1.976 einstaklingar á Hjálmar að bjóða sig fram í fyrsta sætið en í prófkjörinu fékk hann 1.421 atkvæði í fyrsta til þriðja sæti. En allt um það, nú vill hann ekki bara einhvern einstakling í þriðja sætið í sinn stað, heldur helst suðurnesjakonu.

"Já ég er þeirrar skoðunar að það þurfi að vera meira jafnvægi í þessu og það teldi ég vera mjög hyggilegt," segir Hjálmar.

"Ég hef heyrt þessa tillögu. Ég er náttúrlega ekki í aðstöðu til að taka afstöðu til hennar, en ég skil þessa tillögu og virði hana. En að sjálfsögðu verða Sunnlendingar sjálfrir og Suðurnesjamenn, sameiginlega, að komast að niðurstöðu um það," segir Jón Sigurðsson formaður Framsóknarflokksins.

Mest lesið


Fleiri fréttir

Sjá meira


×

Mest lesið