Stjórnlaus tankbíll í fimm bíla árekstri á Akureyri

Umferðaróhapp varð á Akureyri síðdegis. Tankbíll náði ekki að stoppa og rann niður Þórunnarstræti og yfir gatnamót. Fimm bílar urðu fyrir skemmdum.

Slysið var með þeim hætti að ökumaður vöruflutningabifreiðar með festivagn missti stjórn á bifreiðinni í hálku á leið niður Þórunnarstræti og hafnaði aftan á fólksbifreið sem að var kyrrstæð á rauðu ljósi við gatnamótin. Fólksbifreiðin rann inn á Glerárgötu en vörubifreiðin rann áfram og hafnaði á jeppabifreið sem að var kyrrstæð inn á gatnamótunum. Jeppabifreiðin lenti svo á fólksbifreið sem að var ekið norður Glerárgötu en sú bifreið lenti svo á pallbifreið sem að var kyrrstæð á rauðu ljósi austan við gatnamótin. Vörubifreiðin rann áfram yfir umferðareyju og stöðvaðist á bifreiðastæði austan við Glerárgötu.

Nota þurfti klippur til að ná ökumanni og farþega út úr jeppabifreiðinni en þau voru ekki talin alvarlega slösuð. Þau voru flutt á slysadeild til skoðunar.

Ökumaður fólksbifreiðarinnar sem að jeppinn lenti á kvartaði undan eymslum í hálsi og var fluttur á slysadeild.

Jeppabifreiðin og fólksbifreiðarnar voru fluttar af vettvangi með dráttarbifreið. Nota þurfti stórvirka vinnuvél við að draga vörubifreiðina út af bifreiðastæðinu.

Loka þurfti hluta Þórunnarstrætis og Glerárgötu vegna málsins en mikil umferð var á þessum tíma.