Kýrin Blúnda setur glæsilegt Íslandsmet

Kýrin Blúnda frá Helluvaði á Rangárvöllum hefur sett nýtt og glæsilegt Íslandsmet í mjólkurafköstum einstakra kúa í landinu. Fréttablaðið Dagskráin á Selfossi sagði frá þessu fyrir helgi.

Blúnda náði þeim einstaka árangri á síðasta ári að mjólka 13.327 kg. mjólkur en fyrra Íslandsmet átti Gláma 913 í Stóru-Hildisey II 12.762 kg og var það frá árinu 2004. Það sem gerir árangur Blúndu 468 einstæðan er að hún bar ekki fyrr en mánuður var liðinn af árinu eða þann 1. febrúar sl. Hún náði síðan hæst 57 kg nyt og hélt yfir 50 kg/dag í yfir 3 mánuði. Blúnda er í eigu Ara Árnasonar og Önnu Maríu Kristjánsdóttur.