Olíuyfirráð í Írak að ráðast

Lagafrumvarp sem veitir ríkisstjórninni í Bagdad yfirráð yfir olíulindum Íraks er nánast tilbúið að því er fram kemur í stórblaðinu New York Times í dag. Mikil pólitísk átök hafa verið um yfirráð yfir þessum þriðju mestu olíulindum heims undanfarin misseri en stærstur hluti þeirra er á svæðum sjía og Kúrda. Miðstýring olíunnar er talin hafa lykilþýðingu í að friða súnnía sem óttast að landinu verði skipt upp og auðlindunum með. Frumvarpið á þó enn eftir að fara í gegnum ríkisstjórn og loks íraska þingið og því er ekki gefið mál að það verði samþykkt.