90 sprengjusvæði bíða hreinsunar

Um 90 skot- og sprengjuæfingasvæði bíða hreinsunar eftir brotthvarf varnarliðsins. Þetta kom fram í ræðu Valgerðar Sverrisdóttur, utanríkisráðherra, í Háskóla Íslands í dag um öryggis- og varnarmál.

Stefnt er að því að á næstu fimm árum verði lokið við gerð úttektar á öllum æfingarsvæðum varnarliðsins og þá verði hreinsun á verstu svæðunum jafnframt lokið.

Svæðin ná yfir rúmlega 24 þúsund hektara lands. Flest eru þau á Stór-Reykjavíkursvæðinu og Reykjanesi, en nokkur eru á Vesturlandi, Norðurlandi, og á Austfjörðum. Langstærstu svæðin eru frá tíma seinni heimsstyrjaldarinnar vegna æfinga breska hernámsliðsins og síðar Bandaríkjamanna. Valgerður sagði verkið ærin starfa, en þar nytum við sprengjusérfræðinga Landhelgisgæslunnar, sem lögum samkvæmt færi með þetta verkefni.