Fráleitt að benda á Ríkisendurskoðun

Margrét Frímannsdóttir, þingmaður Samfylkingar, segir fráleitt að vísa ábyrgð á eftirlitsleysi með fjárreiðum Byrgisins á Ríkisendurskoðun. Sigurður Þórðarson ríkisendurskoðandi er kallaður fyrir Fjárlaganefnd á morgun til að ræða eftirlit með framlögum og styrkjum til félagasamtaka. Hvorki Ríkisendurskoðandi né Fjárlaganefnd fékk í hendur fimm ára gamla trúnaðarskýrslu þriggja ráðuneyta um fjárreiður Byrgisins. Henni var stungið undir stól. Margrét segir Félagsmálaráðuneytið og meirihluti fjárlaganefndar beri þarna alla ábyrgð.Og hún sé ekki lítil, ekki síst ef í ljós komi að eftirliti með slíkri starfsemi sé almennt jafn mikið ábótavant og þarna. Hún segir trúna af hinu góða, þegar fólk eigi erfitt, en slíkt komi aldrei í staðinn fyrir meðferð, þegar um sé að ræða sjúkdóma. Hún spyr hvort krabbameinsjúklingar yrðu sendir í slíka meðferð hjá félagasamtökum út í bæ án þess að fagleg þjónusta væri í boði.