Eldur í bílskúr í Breiðholti

Eldur kviknaði í bílskúr í Breiðholti síðdegis í gær en þar var 18 ára piltur að setja bensín á fjórhjól um leið og hann reykti sígarettu. Að sögn lögreglu fór eitthvað af eldsneytinu á gólfið og þegar á það féll glóð úr sígarettunni kviknaði eldur.

Pilturinn reyndi að slökkva eldinn með vatnsslöngu en það dugði skammt. Þá opnaði hann litla hurð á bílskúrnum en við það varð sprenging. Lögregla segir piltinn hafa notið aðstoðar góðra manna við að slökkva eldinn en hann hafi ekki sakaði í atvikinu.

Svipað atvik átti sér stað í Grafarvogi á mánudag en þá brenndist fertugur karlmaður á höndum og í andliti þegar hann var að gera við bensínleka í bifreið í Grafarvogi en hafði gert hlé á vinnu sinni til að fá sér sígarettu.  Þegar maðurinn drap í sígarettunni mynduðust bensíngufur og sprenging varð með fyrrgreindum afleiðingum.