Meirihluti dagforeldra ætlar að lækka gjaldskrá

84 prósent dagforeldra í Reykjavík ætla að lækka gjaldskrá sína í kjölfar aukinna niðurgreiðslna frá borginni. Þetta kemur fram í könnun sem þjónustumiðstöðvar í Reykjavík gerðu meðal dagforeldra í janúarbyrjun og kynnt var í leikskólaráði Reykjavíkurborgar í dag.

Niðurgreiðslur til dagforeldra hækkuðu um þriðjung um áramót og gagnrýndi minnihlutinn í borgarstjórn að þær hækkanir hefðu ekki verið skilyrtar á þann hátt að dagforeldrum bæri að lækka gjaldskrá sína.

Í tilkynningu frá borginni í dag kemur fram að samkvæmt könnuninni ætli rúmlega helmingur dagforeldra að lækka gjaldskrá sína sem nemur helmingi þeirrar aukningar sem varð á niðurgreiðslum borgarinnar eða meira. 97 prósent dagforeldra í borginni svöruðu könnuninni.

Á fundi leikskólaráðs Reykjavíkur 17. janúar var jafnframt ákveðið að setja á laggirnar starfshóp til að semja verklagsreglur um málsmeðferð vegna daggæslu í heimahúsum. Tillögurnar verða unnar í samstarfi við stjórn Barnavistunar, félags dagforeldra.