Kristinn tekur ekki sæti á lista Framsóknarflokksins

Kristinn H. Gunnarsson, þingmaður Framsóknarflokksins í Norðvesturkjördæmi hefur ákveðið að taka ekki sæti á lista flokksins við næstu Alþingiskosningar. Fréttavefur Bæjarins besta segir að Kristinn hafi tilkynnt formanni kjördæmasambands Framsóknarflokksins í kjördæminu um ákvörðun sína í dag.

Í tilkynningu frá Kristni sem birt er á vef Bæjarins besta segir: „ Á kjörtímabilinu hef ég verið gagnrýninn á ýmislegt sem flokkurinn hefur staðið að og ég tel að hafi vikið um of frá stefnu flokksins og vilja kjósenda hans. Þar má helst nefna einkavæðingu ríkisfyrirtækja í fákeppnisumhverfi, vaxandi misskiptingu í þjóðfélaginu sem útfærsla skattalækkana á kjörtímabilinu hefur aukið og viðvarandi áhuga- og árangursleysi í byggðamálum á stórum landssvæðum eins og nýlegar upplýsingar staðfesta.

Niðurstaða prófkjörsins í nóvember sl. er að meirihluta til stuðningur við þá stefnu sem rekin hefur verið undanfarin ár og möguleikar mínir til þess að hafa áhrif á hana úr 3. sæti listans verða enn minni en verið hafa til þessa. Tel ég ekki rétt að taka sæti á framboðslistanum í ljósi þess að ég mun halda ótrauður áfram að tala fyrir þeim sjónarmiðum sem fram á síðustu ár hafa verið ofan á í Framsóknarflokknum og er ágætlega lýst með kjörorðinu manngildi ofar auðgildi. Frekari ákvörðun hef ég ekki tekið en fljótlega munu framtíðaráform mín skýrast."

Fram kemur á fréttavef Skessuhorns að kjörnefnd Framsóknarflokksins í Norðvesturkjördæmi komi saman í kvöld til fundar og ræði þá stöðu sem nú er komin upp eftir að Kristinn afþakkaði sætið.