Skilorðsbundið fangelsi fyrir að geta ekki borgað fyrir mat

Karlmaður var í Héraðsdómi Reykjavíkur í dag dæmdur í fjögurra mánaða skilorðsbundið fangelsi fyrir að hafa pantað og neytt veitinga að upphæð ríflega 10 þúsund krónur á veitingastað í borginni án þess að geta greitt fyrir þær.

Maðurinn á að baki sakaferil sem nær aftur til ársins 1989 en með brotinu rauf hann skilorð dóms sem hann fékk síðla árs 2005. Hann játaði brotið fyrir dómi og sagðist hafa greitt fyrir matinn síðar en lagði ekki fram skriflega yfirlýsingu þar um fyrir dóminn.

Með tilliti til þess var refsing hans ákveðin fjögurra mánaða fangelsi sem skilorðsbundin er til þriggja ára. Jafnframt ber honum að greiða reikninginn á veitingastaðnum.