Rannsakað hvort fimm ára telpu hafi verið nauðgað

Sérstaklega er nú rannsakað hvort maðurinn, sem handtekinn var í Reykjavík í gær eftir að hafa áreitt fjórar ungar stúlkur kynferðislega, hafi komið fram vilja sínum við fimm ára stúlku úr hópnum.

Maðurinn, sem er 26 ára, var úrskurðaður í gæsluvarðhald í allt að tíu daga í gær en hann er grunaður um að hafa áreitt stúlkurnar kynferðislega, sitt í hvoru lagi, í Vogahverfi í Reykjavík í fyrradag.

Stúlkurnar eru á aldrinum 5-12 ára og reyndi hann án árangurs að tæla þrjár eldri stúlkurnar upp í bíl sinn með lævísum gylliboðum. Hinsvegar hafði hann afskipti af þeirri yngstu á óvöktuðum leikvelli og liggur ekki fyrir hversu langt hann gekk. Rannsakendur óttast hið versta og hafa lífssýni meðal annars verið tekin úr henni og manninum til rannsóknar.

Tilkynningar bárust um brotin um miðjan dag í gær og var maðurinn handtekinn síðdegis í gær. Lýsing stúlknanna á bíl hans leiddi til skjótrar handtöku. Ný stofnuð Kynferðisbrotadeild lögreglu höfuðborgarsvæðisins hefur málið til rannsóknar. Maðurinn mun ekki hafa gerst uppvís að ámóta brotum áður.