Þriðja umræða um RÚV-frumvarp heldur áfram

Þriðja umræða um frumvarp um hlutafélagavæðingu Ríkisútvarpsins hélt áfram nú fyrir stundu eftir umræður um störf þingsins og fundarstjórn forseta sem stóðu í rúman klukkutíma.

Þar var meðal annars deilt um það hvort forseti þingsins færi gegn lögum og hefðum þingsins með því að ýta öllum öðrum þingmálum til hliðar nema RÚV-frumvarpinu. Þá var einnig deilt um það hvort stjórnarandstaðan hefði staðið fyrir málþófi í þriðju umræðu um furmvarpið en umræða um það hefur staðið frá því á mánudag.

Ögmundur Jónasson, þingmaður Vinstri - grænna, stendur nú í ræðupúlti og heldur áfram með ræðu sem hann lauk ekki í gærkvöld en fundi var frestað um miðnætti í gær þegar hann hafði talað í tæpa klukkustund.

Hvorki stjórn né stjórnarandstaða vilja gefa eftir í málinu og má búast við að þriðja umræða um RÚV-frumvarpið standi í allan dag og jafnvel fram á kvöld. Níu þingmenn eru nú á mælendaskrá.