Í gæsluvarðhaldi vegna kynferðisbrota gegn stúlkum

Maður á þrítugsaldri var úrskurðaður í gæsluvarðhald í dag, grunaður um að hafa áreitt fjórar stúlkur kynferðislega, sitt í hvoru lagi, í Vogahverfi í Reykjavík. Stúlkurnar eru á aldrinum 5-12 ára. Tilkynningar bárust um brotin um miðjan dag í gær og var maðurinn handtekinn síðdegis í gær.

Lýsing á bíl mannsins leiddi til skjótrar handtöku. Maðurinn hefur verið yfirheyrður í dag en lögregluvarðstjóri veitti ekki upplýsingar um hvers kyns brotin hefðu verið.

Kynferðisbrotadeild lögreglu höfuðborgarsvæðisins hefur málið til rannsóknar en maðurinn, sem er fæddur 1980, verður í gæsluvarðhaldi til 26. janúar.