Gæsluvarðhald yfir síbrotamanni staðfest

Hæstiréttur Íslands staðfesti í dag gæsluvarðhaldsúrskurð yfir síbrotamanni. Maðurinn var í desember dæmdur í fimm ára fangelsi fyrir ýmis brot svo sem nytjastuld, skjalafals og þjófnaði.

Maðurinn var settur í gæsluvarðhald í byrjun janúar en sá úrskurður var felldur úr gildi þar dómnum yfir honum hafði verið áfrýjað og málið þar með færst yfir til Ríkissaksóknara frá Lögreglustjóranum í Reykjavík sem sótti um gæsluvarðhaldið. Ríkissaksóknari fór því fram á gæsluvarðhald í lok síðustu viku og var það úrskurðað í Héraðsdómi Reykjavíkur á föstudaginn. Hæstiréttur stytti þó gæsluvarðhaldið um mánuð en maðurinn á að sæta því á meðan mál hans er fyrir Hæstarétti en þó ekki lengur en til 2. apríl.