Kuldamet vetrarins fallið - frostið 27,4 stig í Bárðardal

Hörku frost er nú víða á norðanverðulandinu og milli klukkan 14 og 15 fór frostið niður í 27,4 gráður í Svartárkoti í Bárðardal og 22,2 gráður á Torfum í Eyjafjarðarsveit. Í dag hefur verið harðnandi frost á Akureyri og mældist frostið 14,2 gráður nú klukkan þrjú í dag.

„Kuldamet þessa vetrar er klárlega fallið og það sem meira er, er að það er enn að kólna alla vega fram á nóttina," segir Sigurður Þ. Ragnarsson yfirveðurfræðingur á Veðurstofu Stöðvar 2. Hann segir frostið á Kárahnjúkum og við Mývatn hafa verið tæpar 22 gráður klukkan 15.

„Það sem skýrir þetta er að yfir landinu er heimsskautaloft og þegar saman fer lítill eða enginn vindur og bjartviðri í dölum þar sem kalda loftið fær frið til að setjast að og kólna má búast við þessu. Vindur fer hins vegar vaxandi á morgun á þessum slóðum og þá má búast við að það dragi úr mestu kuldunum," segir Sigurður.