Telja að ensím úr þorski geti nýst gegn fuglaflensu

Íslenska fyrirtækið Zymetech telur að ein af framleiðsluvörum þess, svokallað Pensím, geti hjálpað til í baráttunni við fuglaflensu. Þetta kemur fram í frétt breska dagblaðsins Times.

Þar segir að vísindamenn við Háskóla Íslands hafi stofnað fyrirtækið árið 1996 en það hafi einbeitt sér að framleiðslu lyfja og snyrtivara úr þorskensímum. Þar á meðal sé Pensím sem reynst hafi vel gegn húðsjúksdómum eins og exemi og psoriasis.

Haft er eftir Jóni Braga Bjarnasyni, prófessor í lífefnafræði og framkvæmdastjóra fyrirtækisins, að tilraunir hafi hins vegar leitt í ljós að pensím eyði 99 prósentum af H5N1-veirufrumum innan fimm mínútna. Niðurstöðurnar lofi mjög góðu sem þýði að hugsanlega verði hægt að nota ensímið til að þróa ný lyf gegn fuglaflensu.

Fram kemur að Jón Bragi hafi í nærri þrjá áratugi rannsakað ensím í fiskum en hann varð fyrst var við áhrif þeirra þegar hann vann sem sjómaður í hlutastarfi með námi á áttunda áratugnum.