Norræna ekki til Íslands í vikunni vegna veðurhams á Norðurlöndum

Norræna er nú á leið frá Björgvin í Noregi til Hanstholm í Danmörku en skipið þurfti á laugardag að snúa við vegna óveðursins sem gekk þá yfir Norðurlönd.

Fram kemur á vef Smyril-Line, sem rekur Norrænu, að von sé á skipinu til Hanstholm í kvöld en þaðan mun það sigla aftur til Björgvinjar og þaðan til Þórshafnar í Færeyjum. Norræna fór frá Þórshöfn á föstudagsmorgun áleiðis til Noregs. Þaðan átti að fara til Hanstholm en snúið við vegna veðursins.

Þessar tafir Norrænu þýða að áætlun skipsins hefur raskast og kemur skipið því ekki til Íslands í vikunni. Í næstu viku fer skipið svo í þurrkví til viðhalds og falla þá alls niður tvær ferðir til Íslands. Því er ekki reiknað með henni til Seyðisfjarðar fyrr en í lok mánaðarins.