Merkingum matvæla ábótavant

Umhverfisstofnun telur að bæta þurfi merkingar matvæla en könnun stofnunarinnar hefur leitt í ljós nokkrar brotalamir í þeim efnum. Stofnunin kannaði merkingar á ýmsum tilbúnum réttum, alls 67 vörum, og kom í ljós að magnmerkingar voru ekki réttar í þriðjungi tilfella.Segir í skýrslu stofnunarinnar að þessu atriði sé því mjög ábótavant og að framleiðendur þufi að skoða þetta atriði vel.

Rannsókn Umhverfisstofnunar leiddi enn fremur í ljós að í þriðjungi tilvika voru upplýsingar um vöruheiti, nettóþyngd og geymsluþol ekki í sama sjónsviði eins og kveðið er á um í reglugerð. Með sama sjónsviði er átt við að neytandi geti tekið upp umbúðir vörunnar og lesið allar þær upplýsingar sem eiga að vera í sama sjónsviði án þess að þurfa að snúa pakkningunni.

Það er í höndum framleiðenda að gera úrbætur í þessum málum og hafa heilbrigðiseftirlitssvæði eftirlit með því að farið sé að tilmælum Umhverfisstofnunar.