Útvarpsstjóri segir ummæli Ögmundar ómerkileg

Páll Magnússon, útvarpsstjóri, segir rangt að hann hafi gerst tvísaga um réttindi starfsfólks Ríkisútvarpsins. Ögmundur Jónasson, þingmaður Vinstri-grænna, hélt því fram í þingsal í dag að Páll hefði sagt eitt við starfsmenn Ríkisútvarpsins um réttindi þeirra, eftir að nýtt frumvarp um Ríkisútvarpið gengur í gegn, en annað við þingmenn.

Páll segir ummæli Ögmundar ómerkileg enda hafi hann sagt það sama við báða hópa það er að nýja félagið yfirtaki bæði kjarasamninga starfsmanna og ráðningarsamninga þeirra óbreytta. Þeir starfsmenn sem séu í A-hluta Lífeyrissjóðs starfsmanna ríkisins geti verið það áfram en yfirlýsing þess efnis liggur fyrir frá lífeyrissjóðnum og með hans samþykki sé þetta hægt. Ögmundur sakaði Ríkisútvarpið jafnframt um villandi fréttaflutning af könnun sem stofnunin lét gera um frumvarpið en Páll vísar því alfarið á bug og segir ekkert óeðlilegt við fréttaflutninginn. Páll segir umræðuna á Alþingi á þessum lokaspretti frumvarpsins lýsa nokkrum taugatitringi.