Ráðherrar sakaðir um að leyna Alþingi gögnum um RÚV

Stjórnarandstaðan sakaði menntamálaráðherra og fjármálaráðherra í dag um að hafa vísvitandi leynt Alþingi mikilsverðum gögnum um Ríkisútvarpið og krafðist þess að afgreiðslu lagafrumvarpsins yrði frestað fram yfir kosningar. Stjórnarflokkarnir stefna að kvöld- og morgunfundum í þinginu svo unnt verði að ljúka málinu á næstu sólarhringum. Áður en umræða gat hafist um sjálft frumvarpið í dag fór hálf önnur klukkustund í umræður um störf þingsins og fundarstjórn forseta, sem samt sem áður mestu sneri að mestu um RÚV-frumvarpið. Athygli vakti að Mörður Árnason, framsögumaður Samfylkingarinnar, flutti nærri þriggja klukkustunda ræðu og má ætla að stjórnarandstöðuþingmenn flytji ræður í lengra laginu í kvöld og næstu daga um málið en þetta er 3. umræða og þar með lokaumræðan.