Engin ákvörðun um greiðslu dvalargjalds til Samhjálpar

Engin ákvörðun hefur verið tekin um það hjá Velferðarsviði Reykjavíkurborgar hvort dvalargjald verður greitt til Samhjálpar fyrir þá skjólstæðinga borgarinnar sem verið hafa í Byrginu, segir Stella K. Víðisdóttir, sviðsstjóri Velferðarsviðs Reykjavíkurborgar.

Borgin hefur greitt um 58 þúsund krónur á mánuði til Byrgisins sem teknar eru af þeim félagslega stuðningi sem skjólstæðingarnir fá frá borginni en eins og greint hefur verið frá stendur til að fela Samhjálp rekstur Byrgisins eftir að skýrsla Ríkisendurskoðunar leiddi í ljós mjög alvarlega vankanta á fjármálum Byrgisins.

Stella segir að dvalargjald hafi verið greitt fyrir fjóra einstaklinga í Byrginu í desember og aðeins einn í nóvember en óvíst sé um framhaldið. Borgaryfirvöld eigi eftir að skoða skýrslu Ríkisendurskoðunar og meta málið í kjölfarið.