Þriðja umræða um RÚV-frumvarpið í fullum gangi

Stjórnarandstæðingum á Alþingi varð ekki að ósk sinni um að þriðju umræðu um frumvarp um Ríkisútvarpið ohf. yrði frestað vegna upplýsinga um samskipti stjórnvalda og Eftirlitsstofnunar EFTA, ESA.

Þriðja og síðasta umræða um frumvarpið hófst á þriðja tímanum og er búist við að hún standi langt fram á kvöld og haldi svo áfram á morgun. Stjórnarandstæðingar vildu fresta umræðu um málið vegna upplýsinga um að ráðuneyti menntamála og fjármála hefðu átt í bréfaskriftum við ESA um RÚV-frumvarpið sem menntamálanefnd hefði ekki verið greint frá. Taldi stjórnarandstaðan að ráðherrar hefðu leynt upplýsingunum og að meiri tíma þyrfti til að fara yfir þær.

Þessu hafnaði menntamálaráðherra og sakaði stjórnarandstöðu um fyrirslátt í málinu. Nú klukkan fjögur voru átta manns á mælendaskrá og ekki er loku fyrir það skotið að fleiri bætist við.