Kútter Sigurfari verður sjófær á ný

Ríkisstjórnin hefur ákveðið að verja 60 milljónum króna á næstu 5 árum til endurgerðar og varðveislu kútters Sigurfara, sem staðið hefur við Byggðasafn Akraness undanfarin ríflega 30 ár, með það fyrir augum að gera skipið sjófært á ný.

Fram kemur í tilkynningu frá Akranesbæ að viðgerð á skipinu sé nú orðin afar brýn en það er eitt helsta tákn Akraness þar sem hann stendur á áberandi stað á Safnasvæðinu á Akranesi. Haldi margir því fram að Sigurfari sé hin eina og sanna þjóðarskúta okkar Íslendinga.

Undirbúningsvinna vegna fyrirhugaðra endurbóta er þegar hafin og verður verkið boðið út á hinu evrópska efnahagssvæði eins fljótt og mögulegt er. Ekki liggur því fyrir hvort skipið verður sent til útlanda til viðgerðar eða hvort viðgerðin fer fram hér á landi.

Samhliða endurbótunum er unnið að útfærslu hugmynda um hvernig skipið verður nýtt að endurgerð lokinni. Með því að gera bátinn aftur sjófæran skapist fjölmörg tækifæri, ekki síst í ferðaþjónustu en einnig megi nýta skipið við kennslu.

Samningur um verkefnið verður undirritaður milli menntamálaráðuneytisins, Akraneskaupstaðar, Hvalfjarðarsveitar og Byggðasafnsins í Görðum á Akranesi um borð í skipinu á morgun.