Stutt kosningaþing hefst í dag

Tvö mál eru á dagskrá þessa fyrsta fundar Alþingis á árinu, frumvarp ríkisstjórnarinnar um Ríkisútvarpið og fylgifrumvarp þess um Sinfóníuhljómsveit Íslands, en djúpstæður ágreiningur er milli stjórnar og stjórnarandstöðu um hlutafélagsvæðingu Ríkisútvarpsins. Þingfundur hefst klukkan hálftvö og má búast við kraftmiklum umræðum, eins og raunar alla þá liðlega þrjátíu fundardaga Alþingis sem áformaðir eru næstu tvo mánuði. Þingstörfin næstu vikur munu án vafa bera skýr merki þess að Alþingiskosningar verða 12. maí og líklegt að þingmenn hafi notað langt jólafrí til að brýna klærnar fyrir kosningabaráttuna, en störfum þingsins fyrir jól lauk þann 9. desember. Umræðan um Ríkisútvarpið í dag er þriðja og síðasta umræðan um frumvarpið og má búast við að það verði lögfest á næstu dögum. Samkvæmt starfsáætlun þingsins er gert ráð fyrir að síðasti fundardagur verði 15. mars, og fá menn því tvo mánuði til að heyja kosningabaráttu utan þings.