Íslenskir neytendur tilbúnir til að borga hátt verð fyrir brauð

Ástæður fyrir háu matarverðs hafa verið ræddar í þaula í kjölfar könnunar Evrópsku hagstofunnar sem sýnir að verð á matvælum er ríflega 60% hærra hér á landi en í evrópusambandslöndum. Sitt sýnist hverjum um ástæður hás verðlags.

Verð á brauði í bakaríum hefur ekki verið kannað um árabil og hefur gagnrýni á hátt brauðverð komið fram hjá Bændasamtökum Íslands og fleirum sem benda á að tolar á hráefni til framleiðslu á brauði séu ekki háir. Formaður Landssamtaka bakarmeistara segir verð á brauði skýrast af nokkrum þáttum. Launakostnaður hafi aukist og nemi nú um 45% af kostnaði,hráefniskostnaður nemi um 30% kostnaðar hjá bakaríum og annar kostnaður sé um 25-27%.

Formaðurinn, Reynir Carl Þorleifsson, segir að þó svo að íslenskir neytendur séu tilbúnir að greiða hátt verð fyrir brauð og bakarar finni ekki fyrir neinni óánægju hjá sínum kúnnum, muni bakarameistarar bregðast við áskorun forsætisráðherra um að lækka matarverð í byrjun mars og hafi það þegar verið rætt í þeirra hópi. Bakarar kjósi að brauðverð sé hið sama hér á landi og í Evrópu en margir kostnaðarliðir komi þar til.