Tilkynnt um viðbrögð á næstu dögum

Félagsmálaráðherra hefur ekki tekið afstöðu til þeirra aðgerða sem heyrnarlausir telja þörf á að gripið verði til vegna nýrrar könnunar sem leiðir í ljós að þriðjungur þeirra kann að hafa verið beittur kynferðisofbeldi.

Hann segir að það verði gert á allra næstu dögum. Ráðherrann segir könnunina, sýna að mjög alvarlegt mál sé á ferðinni. Berglind Stefánsdóttir fráfarandi formaður Félags heyrnarlausra segir að boðið hafi verið upp á ráðgjöf fyrir heyrnarlausa eftir að tveir dómar féllu í kynferðisofbeldismálum þar sem heyrnarlausir komu við sögu. Þá hafi hinsvegar ekki verið ljóst hversu stór vandinn væri innan samfélags heyrnarlausra.