Fjórtán þúsund metnir með örorku

Draga má þá ályktun að fleiri í hópi öryrkja hafi tiltölulega vægari heilsufarsvandamál en áður, segir fyrrverandi tryggingayfirlæknir, enda ekkert sem bendir til þess að heilsufari þjóðarinnar hafi farið hrakandi þótt enn fjölgi öryrkjum.

Í nýrri úttekt í Læknablaðinu kemur fram að í árslok árið 2005 voru um 14 þúsund Íslendingar metnir með örorku

Sigurður Thorlacius, fyrrverandi tryggingalæknir, einn þeirra sem vann að úttektinni segir skýringarnar ýmsar. Ekki síst sveiflur á atvinnustigi, hækkandi aldur þjóðarinnar og aukin krafa um afköst á vinnumarkaði sem hefur í för með sér að þeir sem eru veikir fyrir gefast upp.

Áberandi munur er á stöðu karla og kvenna en átta prósent kvenna eru metnar með örorku á móti rúmum fimm prósentum karla og sem fyrr er örorka algengari í yngstu aldrushópum á Íslandi en á hinum Norðurlöndunum. Enn er erfitt að benda á eina ástæðu en nefnt er í skýrslunni að minna sé hér um úrræði til starfsendurhæfingar fyrir yngri aldurshópa en í grannríkjunum.

Þá er átt við ungt fólk sem stríðir við sjúkdóma, hefur litla menntun og því minni möguleika á vinnumarkaðinu. Stöðu þeirra þarf að bæta að mati Sigurðar.

Aðspurður hvort nægilega sé aðgætt að félagskerfið sé ekki misnotað segir Sigurður að alltaf sé möguleiki á því. Hvert mál sé vandlega skoðað og það þurfi að liggja fyrir góðar upplýsingar um þá sjúkdóma sem fólk eigi að vera haldið til að fá örorku metna.

Hins vegar bendi ekkert til að heilsufari þjóðarinnar fari hrakandi , heldur þvert á móti. Því megi draga þá alyktun að fleiri í hópi öryrkja séu með tiltölulega vægari heilsufarsvandamál en áður að sögn Sigurðar.